ឯកអគ្គរាជទូតខ្មែរប្រចាំកូរ៉េខាងត្បូង ចាត់វិធានការចំពោះមេក្លោងនាំពលករខុសច្បាប់
14-January-2016 | ដោយ មួយឡា
សេអ៊ូល៖ មេខ្លោង ដឹកនាំពលករខ្មែរទៅធ្វើការខុសច្បាប់ ស្ត្រីរៀបការស្វាមីកូរ៉េ និស្សិតដែល បង្កចលាចល បាតុកម្ម ញុះញង់ ឲ្យខូចទំនាក់ទំនងចំណងការទូតកម្ពុជា-កូរ៉េនឹងត្រូវបង្ក្រាប។នេះជាការអះអាងរបស់លោក ស៊ុត ឌីណា ឯកអគ្គរាជទូតខ្មែរប្រចាំកូរ៉េខាងត្បូង នៅថ្ងៃទី ១៣ ខែ មករា ឆ្នាំ ២០១៦។
នៅក្នុងបណ្ដាញទំនាក់ទំនងសង្គមហ្វេសប៊ុក លោក ស៊ុត ឌីណា បានសរសេរពីផែនការបង្ក្រាបថា “ខ្ញុំបានធ្វើកិច្ចការ និងដោះស្រាយបញ្ហាសំខាន់ ដោយសហការជាមួយសមត្តកិច្ចកូរ៉េក្នុងការចាប់មេខ្លោង ដឹកនាំពលករខ្មែរ ស្ត្រីរៀបការស្វាមីកូរ៉េ និស្សិត បង្កចលាចល បាតុកម្ម ញុះញង់ ឲ្យខូចទំនាក់ទំនងចំណងការទូតកម្ពុជា-កូរ៉េ (កូរ៉េលើកយកឈ្មោះ ចំៗ មេៗ ល្បីៗនៅកូរ៉េ ប៉ុន្តែខ្ញុំសុំរក្សាសិទ្ឋិមិនបញ្ចេញឲ្យដឹង)។ រឿងសំខាន់មួយទៀតគឺ មន្ត្រីនៃអង្គភាពស៊ើបការណ៍ពិសេសកូរ៉េ មកពិភាក្សាជាខ្ញុំដល់ស្ថានទូត អំពីករណីពលករខុសច្បាប់ និងប្រើប្រាស់លិខិតឆ្លងដែនផ្លូវការ ដែលមានភស្តុតាង គឺក្រុមភ្នាក់ងារ KNN Cambodia រកស៊ីលើមុខរបរនេះ គឺអាជ្ញាធរសុំសហការស្វែងរកចាប់បណ្តាញទាំងនេះ” ។
ក្រៅពីបង្ហើបឲ្យដឹងពីផែនការបង្ក្រាបទូតខ្មែរនៅកូរ៉េខាងត្បូង ក៏បានឲ្យដឹងដែរថា៖ លោកបានជួយចាត់ចែងលិខិតបើកផ្លូវ និងឧបត្ថម្ភថវិកា បញ្ជូនពលករខ្មែរ មួយរូបដែលមានជម្ងឺសរសៃប្រសាទធ្ងន់ធ្ងរទៅស្រុកខ្មែរវិញ។ លោក ស៊ុត ឌីណា បញ្ជាក់ថា “ក្នុងនោះខ្ញុំបានជួលរថយន្តសង្គ្រោះបន្ទាន់របស់ពេទ្យមួយ ពីសេអ៊ូលលទៅព្រលានយន្តហោះអន្តរជាតិ អ៊ិនឆន់ ក្នុងតំលៃថ្លៃគួរសម ពីព្រោះរថយន្តឈ្នួលដូចជាតាក់ស៊ីគេលែងទទួល និងបានចេញថ្លៃសំបុត្រយន្តហោះពីកូរ៉េទៅស្រុកខ្មែរជូនទៀតផង។ ខ្ញុំក៏បានចាត់បុគ្គលិកនិងជំនួយការផ្ទាល់ កូរ៉េ និង ខ្មែរឲ្យអមដំណើរទៅព្រលានយន្តហោះ អ៊ិនឆន់”ផងដែរ។
សេចក្តីជូនព័ត៌មានដោយឯកអគ្គរដ្ឋទូតកូរ៉េនេះ បានកើតឡើងក្រោយពីសម្តេចតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា បានថ្លែងនៅក្នុងសន្និបាតគណៈកម្មាធិការកណ្តាល លើកទី៣៩ កាលពីថ្ងៃ៩-១០ មករា ២០១៦ នៅមហោស្រពកោះពេជ្រ ដោយព្រមានធ្វើការដកហូតមុខតំណែងឯកអគ្គរាជទូតខ្មែរណា ដែលមិនសកម្មក្នុងការជួយសម្របសម្រួល និងបំរើការងារជូនប្រជាពលរដ្ឋខ្មែរនៅបរទេសទេនោះ៕
ប្រភព៖ meatophoum
ចំនួនអ្នកទស្សនា
- ថ្ងៃនេះ3921
- ម្សិលមិញ6261
- សប្តាហ៍នេះ22301
- ខែនេះ137451
- ឆ្នាំនេះ137451
- សរុប20579907